ಹೊತ್ತು.. ಹೋಯಿತು....

ಹೊತ್ತು.. ಹೋಯಿತು....

ಬರಿದೇ ಹೋಯಿತು ಹೊತ್ತು
ತಮವನುಳಿಸಿ ಈ ದಿನವೂ |
ನಾಳೆ ಹೇಗೋ? ಏನೋ? ಎಂಬ
ಚಿಂತೆ ಮೂಡಿಸಿ ಮೂಡಿಸಿ ಪ್ರತಿಕ್ಷಣವೂ ||

ಬರಿದೇ ಹೋಯಿತು ಹೊತ್ತು
ರವಿ ಮೂಡಿದಾಗಿನಿಂದ, ತಾನು ಮತ್ತೆ
ಬರುವೆನೆನುತ, ತಾ ಹೋಗುವ ದಿಕ್ಕಿನೆಡೆಗೆ|
ತಳಮಳವ ಹೃದಯದಲಡಗಿಸಿ, ಹುದುಗಿಸಿ,
ಎಲ್ಲ ಭಾವಗಳನುಳಿಸಿ, ತಾನು
ಮೆಲ್ಲ ಮೆಲ್ಲನೇ ದೂರಕೆ ಹೋಯಿತು ||

ಎಷ್ಟೆಷ್ಟೋ ವಿಧದಲಿ ಮನದೊಂದಿಗೆ ಮಾತಾಡಿ,
ನಾ ಹೋಗುವೆ ಮತ್ತೆ ಬರುವೆನೆನುತ, ಹೀಗಾಡಿ
ಇನ್ನಾದರೂ ಮಾಡುತಿರು ಹೊಸತೇನಾದರೂ ಸುಮ್ಮನಿರದೆ|
ಹುಡುಕುತಿರು ನಿನ್ನೊಳಗೆ ನೀ, ಹುಟ್ಟುವ ಚಿಂತೆಗೆ
ಚಿಂತನೆಯ ಧಾರೆಯೆರೆಯುತಿರು, ಮರೆಯದಿರು
ಮತ್ತೆ ಬರುವೆ ನಾ ನಾಳೆಗೆ, ಎನುತ ಹೋಯಿತು||

ಬರಿದೇ ಹೋಯಿತು ಹೊತ್ತು
ತಮವನುಳಿಸಿ ಈ ದಿನವೂ |
ನಾಳೆ ಹೇಗೋ? ಏನೋ? ಎಂಬ
ಚಿಂತೆ ಮೂಡಿಸಿ ಮೂಡಿಸಿ ಪ್ರತಿಕ್ಷಣವೂ ||

ಚಂದ್ರಶೇಖರ ಬಿಎಚ್. ೪.೮.೨೦೧೦