ಭೇಟಿಯ ಅವಕಾಶ ಕೈತಪ್ಪಿತ್ತು... ಸೆಪ್ಟಂಬರ್‍ ೫ ಕ್ಕೆ ಒಂದು ನೆನಪು

"Those who educate children well are more to be honored than they who produce them; for these only gave them life, those art of living well." ? -- Aristotle

ಸೆಪ್ಟಂಬರ್‍ ೫ ಎಂದ ಕೂಡಲೇ ನೆನಪಾಗುವುದು ಶಿಕ್ಷಕರ ದಿನಾಚರಣೆ.  ಹಾಗೆಯೇ ಈ ದಿನವನ್ನು ಭಾರತದ ಶ್ರೇಷ್ಠ ಶಿಕ್ಷಕ, ಶಿಕ್ಷಣತಜ್ಞ ಹಾಗೂ ಸ್ವತಂತ್ರ ಭಾರತದ ೨ನೇ ರಾಷ್ಟ್ರಪತಿಯಾಗಿ (೧೯೬೨-೧೯೬೬) ಸೇವೆ ಸಲ್ಲಿಸಿದ ಮಹಾನ್‌ ವ್ಯಕ್ತಿ ಡಾ. ಸರ್ವಪಲ್ಲಿ ರಾಧಾಕೃಷ್ಣನ್‌ರವರ ಜನ್ಮದಿನ (ಸೆಪ್ಟೆಂಬರ್‍ ೫, ೧೮೮೮ ರಿಂದ ಏಪ್ರಿಲ್ ೧೭, ೧೯೭೫).

ಸೆಪ್ಟೆಂಬರ್‌ ೫, ಅವರ ಹುಟ್ಟುಹಬ್ಬವನ್ನು ಇವರ ವಿದ್ಯಾರ್ಥಿಗಳು ಹಾಗೂ ಬಂಧು-ಮಿತ್ರರು ಆಚರಿಸಬೇಕೆಂದಾಗ, ಅವರಿಗೆ ಶಿಕ್ಷಕ ವೃತ್ತಿ ಮತ್ತು ಶಿಕ್ಷಣದ ಬಗ್ಗೆ ಅಪಾರ ಗೌರವವಿದ್ದ ಕಾರಣ `ಶಿಕ್ಷಕರ ದಿನಾಚರಣೆ' ಯಾಗಿ ಆಚರಿಸಲು ತಿಳಿಸಿದರಂತೆ. ಅಂದಿನಿಂದ ಇಂದಿನಿವರೆವಿಗೂ `ಶಿಕ್ಷಕರ ದಿನ'ವನ್ನಾಗಿ ಆಚರಿಸಲಾಗುತ್ತಿದೆ.

ಇಂತಹ ಸಮಯದಲ್ಲಿ ಹಾಗೂ ಪ್ರತಿದಿನವೂ ಗುರುವನ್ನು ನೆನಯಬೇಕಾದುದು ವಿದ್ಯಾರ್ಥಿಗಳ ಕರ್ತವ್ಯ.  ಶಿಕ್ಷಕ-ಕಿ ಇವರುಗಳಿಂದ ನಮಗೆ ಜಗದ ಅರಿವು, ಅಕ್ಷರಜ್ಞಾನ ಹೀಗೆ ಒಂದಿಲ್ಲೊಂದು ರೀತಿಯಲ್ಲಿ ನಮಗೆ ತಮ್ಮ ಜ್ಞಾನವನ್ನು ನೀಡುತ್ತಾ, ನಮ್ಮನ್ನು ತಿದ್ದಿತೀಡಿ ಉತ್ತಮ ಪ್ರಜೆಗಳನ್ನಾಗಿ ರೂಪಿಸಲು ಶ್ರಮಿಸುವ ಶಿಕ್ಷಕವೃತ್ತಿಯಲ್ಲಿರುವ ಎಲ್ಲ ಶಿಕ್ಷಕ-ಶಿಕ್ಷಕಿಯರಿಗೆ ನಮ್ಮ ಗೌರವ, ನೆನಪಿನ ಕಾಣಿಕೆಗಳಿರಲಿ. ಅವರ ಹಾರೈಕೆಗಳು ನಮಗೆ ಶ್ರೀರಕ್ಷೆ...

ಕಳೆದವಾರ ನಮಗೆ ಪ್ರಾಥಮಿಕ ಶಾಲೆಯಲ್ಲಿ ಪಾಠ ಮಾಡುತ್ತಿದ್ದ ಶಿಕ್ಷಕಿಯನ್ನು ಭೇಟಿ ಮಾಡುವ ಅವಕಾಶದಿಂದ ವಂಚಿತನಾದೆ. ನಾನು ಬಸ್ಸಿನಿಂದ ಇಳಿದು ನಮ್ಮ ಮನೆ ಕಡೆಗೆ ಹೋಗುವ ಬೇರೆ ಬಸ್ಸಿಗೆ ಹತ್ತುವ ಸಂದರ್ಭದಲ್ಲಿ ಟೀಚರನ್ನು ನೋಡಿದೆ.  ಜನಜಂಗುಳಿಯಲ್ಲಿ ಅವರನ್ನು ಕಂಡು ಖುಷಿಯಾಯಿತು.  ಆಗ, ಅವರು ರಸ್ತೆ ದಾಟುತ್ತಿದ್ದರು. ಸರಿ, ನಾನಿದ್ದ ಕಡೆಗೆ ರಸ್ತೆ ದಾಟುತ್ತಿದ್ದರಿಂದ ನಾನೂ ಕಾದೆ. ಆದರೆ, ಅಷ್ಟರಲ್ಲಿಯೇ ನಾನು ಇಳಿದ ಬಸ್ಸಿಗೇ ಅವರು ಹತ್ತಿ, ಕ್ಷಣಮಾತ್ರದಲ್ಲಿ ಭೇಟಿಯ ಅವಕಾಶ ಕೈತಪ್ಪಿತ್ತು.

ಅವರನ್ನು ಭೇಟಿ ಮಾಡುತ್ತೇನೆ ಎಂಬ ನಂಬಿಕೆ ನನಗಿದೆ. ಇತ್ತೀಚೆಗೆ ಶಾಲೆಯ ಕಡೆಗೆ ಹೋಗಿಲ್ಲವಾದರೂ, ಕೆಲವೇ ಕೆಲವು ಶಿಕ್ಷಕಿಯರು ಇನ್ನೂ ಬೋಧನಾವೃತ್ತಿಯಲ್ಲಿದ್ದಾರೆಂದು ತಿಳಿಯಿತು.  ಇಲ್ಲಿ ಶಿಕ್ಷಕಿಯರು ಎಂದು ಏಕೆಂದರೆ, ನಮ್ಮ ಶಾಲೆಯಲ್ಲಿ ಶಿಕ್ಷಕರು ತುಂಬಾ ಕಡಿಮೆ ಇದ್ದರು. ಪಿಟಿ ಮೇಷ್ಟ್ರು, ಹೈಸ್ಕೂಲಿನಲ್ಲಿ ಮೂವರು ಶಿಕ್ಷಕರು ಮಾತ್ರ ಇದ್ದ ನೆನಪು...

ಇದೋ ಶಿಕ್ಷಕ ವೃಂದಕ್ಕೆ ನನ್ನ ನಮನಗಳು.

ಚಂದ್ರಶೇಖರ ಬಿ.ಎಚ್.


ಇದನ್ನೂ ಓದಿ: http://www.iloveindia.com/indian-heroes/sarvepalli-radhakrishnan.html

ಶ್ರೀರಾಮಮಂದಿರ - ಚಿಂತಾಮಣಿ

ಹೆಚ್ಚಿನ ವಿವರಗಳಿಗೆ: http://www.brahmachaitanya.org/

ನೇತಾಜಿ ಸುಭಾಷ ಚಂದ್ರ ಬೋಸರ ಜನ್ಮದಿನ

ಇಂದು ಜನವರಿ ೨೩.

೧೮೯೭ ರ ಜನವರಿ ೨೩ ನೇತಾಜಿ ಸುಭಾಷ ಚಂದ್ರ ಬೋಸರ ಜನ್ಮದಿನ.  ಅವರನ್ನು ನೆನೆವ ದಿನ.  ಮಹಾನ್ ದೇಶಭಕ್ತ, ಅಪ್ರತಿಮ ಧೈರ್ಯಶಾಲಿಯಾಗಿದ್ದ ಇವರು ಭಾರತದಿಂದ ಬ್ರಿಟಿಷರನ್ನು ಹೊರಹಾಕಲು, ಭಾರತಕ್ಕೆ ಸ್ವಾತಂತ್ರ್‍ಯವನ್ನು ಗಳಿಸಿಕೊಡಲು ಇಂಡಿಯನ್ ನ್ಯಾಷನಲ್‌ ಆರ್ಮಿ ಸ್ಥಾಪಿಸಿದರು. ಸ್ವಾತಂತ್ರ್‍ಯ ಹೋರಾಟಗಾರರಲ್ಲಿನ ಪ್ರಮುಖರು.  ಇವರ ಪ್ರಮುಖ ಉಕ್ತಿ: ಗಿವ್ ಮಿ ಬ್ಲಡ್, ಐ ವಿಲ್ ಗಿವ್ ಯು ಇಂಡಿಪೆಂಡೆನ್ಸ್' ಎಂಬುದು.

ಇಂತಹ ಧೀರೋದಾತ್ತ ಚೇತನವನ್ನು ನೆನೆವ ದಿನ ಇದು. ನೇತಾಜಿಗೆ ನಮನಗಳು.

ರಾಷ್ಟ್ರೀಯ ಯುವ ದಿನ - ಜನವರಿ ೧೨ - ಸ್ವಾಮಿ ವಿವೇಕಾನಂದರ ಜನ್ಮದಿನ

 ಅಪ್ರತಿಮ ದೇಶಭಕ್ತ, ಸಂನ್ಯಾಸಿ, ವಿರಕ್ತ, ತೇಜೋವಂತ, ಯುವಶಕ್ತಿಯ ಚೇತನ, ಶ್ರೀ ರಾಮಕೃಷ್ಣ ಪರಮಹಂಸರ ಪ್ರಿಯ ಶಿಷ್ಯ, ಪ್ರೀತಿಯ ನರೇನ್, ಶಾರದಾ ಮಾತೆಯ ಪುತ್ರ, ಭಾರತೀಯತೆಯ ಸಂಕೇತ, ಜನ್ಮದಿನ ಇಂದು. ಜಗತ್ತಿಗೆ ಸನಾತನ ಧರ್ಮವನ್ನು ತಿಳಿಹೇಳಿದ, ಭಾರತೀಯತೆಯನ್ನು ಸಾರಿದ, ಶ್ರೀ ಸ್ವಾಮಿ ವಿವೇಕಾನಂದರ  ಅವತಾರವಾಗಿ ೧೪೯ ವರ್ಷವಾಗಿದೆ (ಜನವರಿ ೧೨, ೧೮೬೩).  ಇಂತಹ ಮಹಾನ್‌ ತೇಜಸ್ವಿಯನ್ನು ನೆನೆವ ದಿನ ಹಾಗೂ ಅದಕ್ಕೆಂದೇ ಭಾರತದಲ್ಲಿ 'ರಾಷ್ಟ್ರೀಯ ಯುವ ದಿನವೆಂದು' ಆಚರಿಸಲಾಗುತ್ತಿದೆ.  ಇಂದಿನ ಶಕ್ತಿಯೇ ಯುವಶಕ್ತಿ ಎಂದು ನುಡಿದಿದ್ದ ವಿವೇಕಾನಂದರಿಗೆ ನಮ್ಮ ನಮನಗಳು.

ಅವರ ಕೆಲವು ಧೀರೋದಾತ್ತ ನುಡಿಗಳನ್ನು ಇಲ್ಲಿ ಸ್ಮರಿಸೋಣ. ಒಂದೊಂದೂ ಸಹ ಎಂತಹ ಚೇತನವನ್ನು ಕೊಡುತ್ತದೆ, ಅಲ್ಲವೇ?

Never think there is anything impossible for the soul. It is the greatest heresy to think so. If there is sin, this is the only sin; to say that you are weak, or others are weak.

Our duty is to encourage every one in his struggle to live up to his own highest idea, and strive at the same time to make the ideal as near as possible to the Truth.

The will is not free - it is a phenomenon bound by cause and effect - but there is something behind the will which is free.

The world is the great gymnasium where we come to make ourselves strong.

You cannot believe in God until you believe in yourself.

Take up one idea. Make that one idea your life - think of it, dream of it, live on idea. Let the brain, muscles, nerves, every part of your body, be full of that idea, and just leave every other idea alone. This is the way to success.

ಸ್ವಾಮಿ ವಿವೇಕಾನಂದರಿಗೆ ನಮೋನಮ:

ಇದನ್ನೂ ನೋಡಿ: 

http://kshanachintane.blogspot.com/2010/01/blog-post_11.html

ಜೈ ಹನುಮಾನ್

(ಶ್ರೀ ಹನುಮಂತ - ಇದು ತೀರ್ಥಹಳ್ಳಿಯ ಕವಲೇದುರ್ಗದಲ್ಲಿ ಇರುವ ಪುಟ್ಟ ಗುಡಿ. ಚಿತ್ರಕೃಪೆ: ಸಹೋದ್ಯೋಗಿ ಕೃಷ್ಣಚಂದ್ರನ್ ಆರ್. )

ಮಾರ್ಗಶೀರ್ಷ ಮಾಸ, ಶುಕ್ಲ ಪಕ್ಷ, ತ್ರಯೋದಶೀ - ಇಂದು ವಾಯುಪುತ್ರ, ಅಂಜನಾಸುತ, ಶ್ರೀ ರಾಮಭಕ್ತ, ಹನುಮಂತನ ಜಯಂತಿ. ಬಜರಂಗಬಲಿ, ಹನುಮಂತನ ದ್ವಾದಶ (೧೨) ಹೆಸರುಗಳನ್ನು ನೆನೆಯೋಣ. 

ಶ್ರೀ ಹನುಮಾನ್ ದ್ವಾದಶ ನಾಮಾವಳಿ

ಹನುಮಾನಂಜನಾ ಸೂನುಃ |
ವಾಯುಪುತ್ರೋ ಮಹಾಬಲಃ

ರಾಮೇಷ್ಟಃ ಫಲ್ಗುಣ ಸಖಃ
ಪಿಂಗಾಕ್ಷೋಽಮಿತವಿಕ್ರಮಃ ||

ಉದಧಿಕ್ರಮಣಶ್ಚೈವ
ಸೀತಾಶೋಕವಿನಾಶಕಃ |

ಲಕ್ಷ್ಮಣಪ್ರಾಣದಾತಾ ಚ
ದಶಗ್ರೀವಸ್ಯ ದರ್ಪಹಾ ||

ದ್ವಾದಶೈತಾನಿ ನಾಮಾನಿ
ಕಪೀಂದ್ರಸ್ಯ ಮಹಾತ್ಮನಃ |

ಸ್ವಾಪಕಾಲೇ ಪಠೇನ್ನಿತ್ಯಂ
ಯಾತ್ರಾಕಾಲೇ ವಿಶೇಷತಃ |

ತಸ್ಯ ಮೃತ್ಯುಭಯಂ ನಾಸ್ತಿ
ಸರ್ವತ್ರ ವಿಜಯೀಭವೇತ್ ||

|| ಜೈ ಹನುಮಾನ್ ||

ಎಲ್ಲರಿಗೂ ಹನುಮಂತನ ದಯವಿರಲಿ.

ಶ್ರೀ ರಾಮ ಜಯ ರಾಮ ಜಯ ಜಯ ರಾಮ

|| ಶ್ರೀ ರಾಮ ಜಯ ರಾಮ ಜಯ ಜಯ ರಾಮ ||

ಚೈತ್ರ ಶುಕ್ಲ ನವಮಿ. ಅಂದು ಅಯೋಧ್ಯಾ ರಾಜನಾದ, ದಶರಥ ಪುತ್ರ ಶ್ರೀ ರಾಮನ ಜನ್ಮದಿನ. ಇದನ್ನು ಸರಳವಾದ ಹಬ್ಬವನ್ನಾಗಿ ಆಚರಿಸುತ್ತಾರೆ. ವಸಂತನಾಗಮನದೊಂದಿಗೆ ಬೇಸಗೆಯೂ ಅಡಿಯಿರಿಸಿರುವಾಗ ಬರುವಂಥಹ ಈ ಹಬ್ಬವು ನಿಜಕ್ಕೂ ಖುಷಿ ಕೊಡುತ್ತದೆ. ಬಿಸಿಲ ಬೇಗೆಯ ನೀಗಿಸಲು ಪಾನಕ, ಕೋಸಂಬರಿ, ಮಜ್ಜಿಗೆ ಸಮಾರಾಧನೆ ಮಾಡುತ್ತಾ ಸರಳವಾಗಿ ಹಬ್ಬವನ್ನು ಆಚರಿಸುತ್ತಾರೆ. ಶ್ರೀರಾಮ ನವಮಿಯಿಂದ ಒಂಭತ್ತು ದಿನಗಳವರೆಗೂ ಕೆಲವರು ಪೂಜೆ, ರಾಮಾಯಣ ಪಠಣ, ಇತ್ಯಾದಿ ಹಮ್ಮಿಕೊಳ್ಳುತ್ತಾರೆ. ಬೆಂಗಳೂರಿನ ಶ್ರೀರಾಮ ಮಂಡಳಿ ಪ್ರತಿವರ್ಷವೂ ಕೋಟೆ ಹೈಸ್ಕೂಲು ಮೈದಾನದಲ್ಲಿ ಸಂಗೀತ ಕಾರ್ಯಕ್ರಮವನ್ನು ಪ್ರಖ್ಯಾತ ಸಂಗೀತಗಾರರನ್ನು ಕರೆಸಿ, ಸಂಗೀತ ಸುಧೆಯನ್ನೇ ಹರಿಸುತ್ತಾರೆ (http://sriramasevamandali.org/) . ರಸ್ತೆ ರಸ್ತೆಗಳಲ್ಲಿ ಮಜ್ಜಿಗೆ, ಕೋಸಂಬರಿ, ಪಾನಕ ಹಂಚುವುದನ್ನೂ ಕಾಣಬಹುದು.

ಎಲ್ಲರಿಗೂ ಶ್ರೀರಾಮನು ಸಕಲ ಸನ್ಮಂಗಳವನ್ನುಂಟು ಮಾಡಲಿ.

ಜೈ ಶ್ರೀರಾಮ್‌

ಮೇರೆ ರಂಗದೇ ಬಸಂತಿ... : ಶಹೀದರುಗಳಿಗೆ ನಮನ

ಇಂದು ಭಗತ್ ಸಿಂಗ್, ರಾಜಗುರು ಮತ್ತು ಸುಖದೇವರನ್ನು ಗಲ್ಲಿಗೇರಿಸಿದ ದಿನ (೨೩ ಮಾರ್ಚ್ ೧೯೩೧). ಈ ಹುತಾತ್ಮರೂ ಇನ್ನೂ ತಾರುಣ್ಯದಲ್ಲಿದ್ದಾಗಲೇ ಭಾರತಮಾತೆಯನ್ನು ಬ್ರಿಟಿಷರಿಂದ ಬಂಧಮುಕ್ತಗೊಳಿಸಲು ಪಣತೊಟ್ಟು, ಪಾರ್ಲಿಮೆಂಟಿನಲ್ಲಿ ಬಾಂಬೆಸೆದು, ಆಂಗ್ಲರ ಪರವಾದ ನ್ಯಾಯಕ್ಕೆ (ಅದು ಯಾವಾಗಲೂ ಹಾಗೆಯೇ ಅಲ್ಲವೇ ಆಳುವವನಿಗೇ ಅಧಿಕಾರ ಮತ್ತು ಕಾನೂನು ತನ್ನ ಮಾತಿನಂತೆ ನಡೆಯುವುದು) ತಮ್ಮನ್ನು ದೇಶಕ್ಕಾಗಿ ಅರ್ಪಿಸಿಕೊಂಡರು. ದೇಶಕ್ಕಾಗಿ ಚಿಂತಿಸಿದರು, ದುಡಿದರು ಹಾಗೂ ತಮ್ಮ ಯೌವನಾವಧಿಯಲ್ಲಿಯೇ ಹುತಾತ್ಮರಾಗಿ ಚಿರಕಾಲ ಜನಮಾನಸದಲ್ಲಿ ಉಳಿದರು. ಇವರೆಲ್ಲ ಪ್ರಾತ:ಸ್ಮರಣೀಯರು. ಅವರು ಅಂದು ನೀಡಿದ ಘೋಷವಾಕ್ಯ ಇಂದಿಗೂ ಪ್ರಸ್ತುತವೆನಿಸುತ್ತದೆ:

“If the deaf are to hear, the sound has to be very loud. When we dropped the bomb, it was not our intention to kill anybody.”

ದೇಶಭಕ್ತಿಯ ಪ್ರತಿರೂಪಗಳಾದ ಈ ಹುತಾತ್ಮರುಗಳಿಗೆ ನಮ್ಮೆಲ್ಲರ ನಮನ ಸಲ್ಲಿಸೋಣ.

ಸ್ವಾಮಿ ವಿವೇಕಾನಂದರ ಒಂದು ಮಾತು - ಬೆಳಕು...

"All the powers in the universe are already ours. It is we who have put our hands before our eyes and cry that it is dark"

Swami Vivekananda

ಈ ಸಿಂಹವಾಣಿಯನ್ನು ಕೇಳುತ್ತಿದ್ದರೆ... ಖಂಡಿತಾ ಅಂದಿಗಿಂತ ಇಂದಿನ ವಾಸ್ತವಿಕ ಪರಿಸ್ಥಿತಿ ಹೆಚ್ಚಾಗಿ ಅನ್ವಯಿಸುತ್ತದೆ ಎನ್ನಬಹುದು. ಇಂದಿನ ಯುವ ಜನಾಂಗವು ವಿದ್ಯಾವಂತರಾಗಿದ್ದೂ ಅಂಧಾನುಕರಣೆ ಮಾಡುತ್ತಾ ತಮ್ಮ ತನವನ್ನು ಮರೆಯುತ್ತಾ ಸಾಗುತ್ತಿರುವುದು ವಿಪರ್ಯಾಸ. ನಮ್ಮ ದೇಶದ ಯುವಶಕ್ತಿಯಲ್ಲಿ ಶಕ್ತಿಯಿದೆ. ಆದರೆ, ಅದರ ಸದುಪಯೋಗ ಆಗುತ್ತಿಲ್ಲವೆನ್ನಬಹುದು. ಯಾವುದೇ ಒಂದು ದೇಶದಲ್ಲಿನ ಯುವಶಕ್ತಿಯ ಸದುಪಯೋಗ ಆ ದೇಶದ ಬಲಶಾಲಿ, ಆರ್ಥಿಕವಾಗಿ ಸದೃಢ ಮತ್ತು ಉತ್ತಮ ಜನಾಂಗವನ್ನು ಹೊಂದುವಲ್ಲಿ ಸಾಫಲ್ಯ ಕಾಣುತ್ತದೆ. ಆದರೆ, ಇಂದಿನ, ಈಗಿನ ಸ್ಥಿತಿಯಲ್ಲಿ ಎಲ್ಲಿ ನೋಡಿದರೂ ಒಂದಲ್ಲಾ ಒಂದು ವಿಧದ ಆತಂಕ, ಆಧುನಿಕತೆಯಲ್ಲಿ ಮೈಮರೆತ, ಮಾದಕ ಸೇವನೆಯತ್ತ ವಾಲಿದ, ವಾಲುತ್ತಿರುವ, ಅಮಲೇರಿದಂತೆ ಹಣದ ಮದ ತೋರಿಸುವವರೇ ಹೆಚ್ಚಾಗುತ್ತಿದ್ದಾರೆ. ಇದೂ ಒಂದು ವಿಧದಲ್ಲಿ ಎಲ್ಲ ಬಲವಿದ್ದೂ ದುರ್ಬಲ ಮತ್ತು ಸಾಮಾಜಿಕ ಸ್ತರಗಳಲ್ಲಿ ಬೇಜವಾಬ್ದಾರಿತನ ತೋರುವವರಾಗಿದ್ದಾರೆ. ಇದನ್ನೇ ನಮ್ಮ ಕೈಗಳನ್ನೇ ಕಣ್ಣೆದುರಿಗೆ ಅಡ್ಡ ಮಾಡಿಕೊಂಡು ಕತ್ತಲೆಯೆಂಬ ಭ್ರಮೆಯಲ್ಲಿ, ನಿರಾಶಾವಾದದಲ್ಲಿ ಬೀಳುವ ಪ್ರಮೇಯ ನಮಗಿದೆಯೆ? ಯುವ ಜನಾಂಗ ಚಿಂತನಾಶೀಲವಾಗಿದ್ದು, ತಮ್ಮ ದೇಶ, ಸಂಪತ್ತು, ಕುಟುಂಬದೆಡೆಗೆ ವಿಶಾಲ ಹೃದಯಿಗಳಾಗಬೇಕಾಗಿದೆ. ಎಲ್ಲ ದುರ್ಬಲತೆಯನ್ನೂ ತೊಲಗಿಸುವಲ್ಲಿ ಸ್ವಾಮಿ ವಿವೇಕಾನಂದರ ನುಡಿಗಳು, ಅವರ ಜೀವನ, ಅವರ ಆದರ್ಶ ಇವುಗಳನ್ನು ಮೈಗೂಡಿಸಿಕೊಂಡರೆ.... ಕತ್ತಲೆಯೆಂಬುದೇ ಇರುವುದಿಲ್ಲ.

ಇಂದು, ಜನವರಿ ೧೨, ದೇಶಕ್ಕೆ ದೇಶವೇ ಸ್ವಾಮಿ ವಿವೇಕಾನಂದರ ಹೆಸರಿನಲ್ಲಿ ರಾಷ್ಟ್ರೀಯ ಯುವದಿನವನ್ನಾಗಿ ಆಚರಿಸುತ್ತಾರೆ. ಸ್ವಾಮೀಜಿಯವರ ಆದರ್ಶ, ಧೈರ್ಯ, ಸ್ಥೈರ್ಯ, ನೈತಿಕತೆ, ವಿಚಾರಶೀಲತೆ ಎಲ್ಲ ರಂಗಗಳಲ್ಲಿಯೂ ಕಂಡುಬರಲಿ.

ಜೈ ಗುರುದೇವ!

ಚಂದ್ರಶೇಖರ ಬಿ.ಎಚ್.
೧೨.೦೧.೨೦೧೧

ಸ್ಫೂರ್ತಿಯ ಚಿಲುಮೆ: ಶಂಕರ ನಾಗರಕಟ್ಟೆ... ಇಂದು ನಿಮ್ಮ ಜನ್ಮದಿನ

೪ನೇ ತಾರೀಖು ಬ್ಲಾಗ್‌ ಮಿತ್ರರೊಬ್ಬರು ನನಗೆ ನಾಳೆ ದಿನ ಜಯನಗರದ ಟೋಟಲ್‌ಕನ್ನಡ ದಲ್ಲಿ ಪುಸ್ತಕ ಬಿಡುಗಡೆ ಇದೆ ಬನ್ನಿ ಎಂದು ಕರೆದರು. ಆದರೆ, ವೈಯಕ್ತಿಕ ಕಾರಣಗಳಿಂದ ಅಲ್ಲಿಗೆ ಹೋಗಲು ಆಗಲಿಲ್ಲ. ಅದು ಕನ್ನಡದ ಸಹಜ ನಟ ಅನಂತನಾಗ್‌ರವರು ಬರೆದ ತಮ್ಮ `ತಮ್ಮನ' ಪುಸ್ತಕ ಬಿಡುಗಡೆ ಕಾರ್ಯಕ್ರಮವಾಗಿತ್ತು. ನನ್ನ ತಮ್ಮ ಶಂಕರ ಪುಸ್ತಕರ ಹೆಸರು.

ಇಂದು ಬೆಳಗ್ಗೆ ಅದೇ ಮಿತ್ರರಿಂದ ಈವತ್ತು ಶಂಕರ್‌ನಾಗ್‌ ಜನ್ಮದಿನ ಎಂದು ತಿಳಿಸಿದರು. ಏನಾದರೂ ಬರೆಯಿರಿ ಅವರ ಬಗ್ಗೆ ಎಂದೂ ಹೇಳಿದರು. ಏನೆಂದು ಬರೆಯುವುದು ಆತನ ಬಗ್ಗೆ.

ಅವರ ಬಗ್ಗೆ ಹೇಳಬಹುದಾದರೆ, ನಟ, ನಿರ್ದೇಶಕ, ರಂಗಕರ್ಮಿ ಶಂಕರ್‌ನಾಗ್‌ ಒಂದು ಚಿಲುಮೆಯ ಸ್ಫೂರ್ತಿ, ಚಟುವಟಿಕೆಯ ಆಗರ, ಅಗಾಧ ಕನಸುಗಾರ, ಅಸಾಧ್ಯವೆಂಬ ಮಾತಿಗೆ ದೂರ, ಛಲಗಾರ, ಅಷ್ಟೇ ಅಲ್ಲದೇ ಸಂಕೇತ್‌ ಎಂಬ ಸ್ಟುಡಿಯೋ ಹುಟ್ಟಿಗೆ ಕಾರಣಕರ್ತ. ಒಂದಷ್ಟು ರಾಜಕೀಯ ಕಾರ್ಯದಲ್ಲೂ ಸಕ್ರಿಯನಾಗಿದ್ದವರು. ಹಾಗೆಯೇ, ಆಟೋರಿಕ್ಷಾದವರ ಕಣ್ಮಣಿ, ಆಟೋರಿಕ್ಷಾಗಳ ಮೇಲೆ ಆತನ ಚಿತ್ರವಿಲ್ಲದ ಆಟೋ ಊಹಿಸಿಕೊಳ್ಳುವುದೂ ಕಷ್ಟ. ಶಂಕರ್‌ನಾಗರ ಬಗ್ಗೆ ಒಂದೆರಡು ಸಾಲು ಬರೆಯಲೂ ಸಾಧ್ಯವಾಗದಷ್ಟು ಅಗಾಧ ರೂಪಿ ಎನ್ನಬಹುದು.

ಅತಿ ಚಿಕ್ಕ ವಯಸ್ಸಿನಲ್ಲಿಯೇ ಮಹತ್‌ಸಾಧನೆಗಳನ್ನು ಮಾಡಿದ ಹಾಗೂ ಇನ್ನೂ ಮಾಡಬೇಕೆಂದಿದ್ದ ಒಬ್ಬ ಕನಸುಗಾರ ಶಂಕರ್‌ನಾಗ್ ಜನ್ಮ ದಿನ ಇಂದು (೯ ನವೆಂಬರ್‌, ೧೯೫೪) ಆದರೆ, ಆತ ಅಕಾಲದಲ್ಲಿಯೇ ಬಿಟ್ಟು ಹೋದ ನೆನಪುಗಳು ಅನೇಕ (ಸೆಪ್ಟೆಂಬರ್‍ ೩೦, ೧೯೯೦). ಅದರಲ್ಲಿ ಮಾಲ್ಗುಡಿ ಡೇಸ್‌... ರಾಷ್ಟ್ರವ್ಯಾಪಿ ಧಾರಾವಾಹಿಯಾಗಿ ಮಾಡಿದ್ದೂ ಸಹ ಒಂದು ವಿಶೇಷ ಸಾಧನೆ.

ಆತನನ್ನು ಒಮ್ಮೆ ಸ್ವತ: ನಾನು ಕಂಡಿದ್ದು ಬಸವನಗುಡಿಯ ನ್ಯಾಷನಲ್‌ ಕಾಲೇಜಿಗೆ ಹೋಗುವ ನಾರ್ತ್‌ರೋಡ್‌ನಲ್ಲಿ, ತನ್ನ ಕಾರನ್ನು ಚಲಾಯಿಸುತ್ತಾ ಸಾಗುತ್ತಿದ್ದದ್ದು.

ದಿವಂಗತ ಶಂಕರ್‌ನಾಗ್‌ ಹೆಸರಿನಲ್ಲಿ ಬೆಂಗಳೂರಿನಲ್ಲಿ ಚಿತ್ರಮಂದಿರವೂ ಇದೆ. ರಂಗಶಂಕರ ರಂಗಮಂದಿರವೂ ಇದೆ. ಹೀಗೆ ಆತನ ನೆನಪು ಸದಾ ಜನಮಾನಸದಲ್ಲಿದೆ.

ಆತನ ಚಿತ್ರಗಳನ್ನು ಮನೆಮಂದಿಯೆಲ್ಲ ಖುಷಿಯಿಂದ ನೋಡಬಹುದಿತ್ತು. ಸೀತಾ ರಾಮು, ಮಿಂಚಿನ ಓಟ, ನೋಡಿ ಸ್ವಾಮಿ ನಾವಿರೋದೇ ಹೀಗೆ, ಸಿಬಿಐ ಶಂಕರ್‍, ಸಾಂಗ್ಲಿಯಾನ (ಭಾಗ೧ ೧-೨), ಗೆದ್ದಮಗ, ಹೀಗೆ ಅನೇಕ ಚಿತ್ರಗಳು. ಒಂದಾನೊಂದು ಕಾಲದಲ್ಲಿ - ಮೊದಲ ಚಲನಚಿತ್ರಕ್ಕೆ ರಾಷ್ಟ್ರಪ್ರಶಸ್ತಿ ಬಂದಿತ್ತು. ಹೀಗೆ ಸಾಗುತ್ತದೆ, ಆತನ ಚಲನಚಿತ್ರ, ನಾಟಕ, ನಿರ್ದೇಶನ ಜೀವನಗಾಥೆ. ಆತನೊಬ್ಬ ಬಲು ಆತ್ಮೀಯ ವ್ಯಕ್ತಿಯಾಗಿದ್ದರು.

ಇನ್ನು ಹೆಚ್ಚಿನ ವಿವರಗಳಿಗಾಗಿ ಇಲ್ಲೊಂದಷ್ಟು ಜಾಲತಾಣಗಳಿವೆ ನೋಡಿ:
http://www.shankarnag.in/
http://www.chakpak.com/celebrity/shankar-nag/biography/11656

ಶಂಕರ್‌ನಾಗ್‌, ನಿಮಗೆ ನಮನಗಳು.

ಚಿತ್ರಕೃಪೆ: ಗೂಗಲ್‌ ಇಮೇಜ್ ಸರ್ಚ್ (Photo courtsey: Google image search)

ನಮನಗಳು ಈ ಮಹನೀಯರುಗಳಿಗೆ

ಅಕ್ಟೋಬರ್‍ ೨, ಇಂದು ಭಾರತದ ಹೆಮ್ಮೆಯ ಪುತ್ರರಾದ ಮಹಾತ್ಮ ಗಾಂಧೀಜಿ ಮತ್ತು ಲಾಲ್‌ ಬಹದ್ದೂರ್‌ ಶಾಸ್ತ್ರಿಯವರ ಜನ್ಮದಿನ.

ಅವರಿಗೆ ನಮ್ಮ ವಂದನೆಗಳು. ಈ ಮಹಾನ್‌ ಚೇತನಗಳು ನುಡಿದಿರುವ ಕೆಲವು ನುಡಿಮುತ್ತುಗಳನ್ನು ನಮ್ಮ ಜೀವನದಲ್ಲಿಯೂ ಅಳವಡಿಸಿಕೊಳ್ಳಲು ಪ್ರಯತ್ನಿಸೋಣ. ಅಂತರ್ಜಾಲದ ಆಧಾರದಿಂದ ಇಲ್ಲಿರುವ ನುಡಿಮುತ್ತುಗಳನ್ನು ಹಾಗೆಯೇ ಇಲ್ಲಿ ಲಗತ್ತಿಸಿದ್ದೇನೆ.

+++++++++++

ಮಹಾತ್ಮಾ ಗಾಂಧೀಜಿಯವರ ೧೦ ಮಾತುಗಳು

1. Strength: The weak can never forgive. Forgiveness is the attribute of the strong.

2. Government: What difference does it make to the dead, the orphans, and the homeless, whether the mad destruction is wrought under the name of totalitarianism or the holy name of liberty and democracy?

3. Self-Help: The only tyrant I accept in this world is the still voice within.

4. Government: It may be long before the law of love will be recognized in international affairs. The machineries of government stand between and hide the hearts of one people from those of another.

5. God: As soon as we lose the moral basis, we cease to be religious. There is no such thing as religion over-riding morality. Man, for instance, cannot be untruthful, cruel or incontinent and claim to have God on his side.

6. Life: There is more to life than simply increasing its speed.

7. Change: We must be the change we wish to see.

8. Self-Help: The best way to find yourself is to lose yourself in the service of others.

9. Truth: The moment there is suspicion about a person's motives, everything he does becomes tainted.

10. Wisdom: Suffering cheerfully endured, ceases to be suffering and is transmuted into an ineffable joy.

Courtesy: source: http://quotations.about.com/od/gandhiquotes/tp/10_gandhi_quote.htm

+++++++++++

ಲಾಲ್‌ ಬಹದ್ದೂರ್‌ ಶಾಸ್ತ್ರಿಯವರ ಸರಳ ಜೀವನಚರಿತ್ರೆಯನ್ನು http://www.iloveindia.com/indian-heroes/lal-bahadur-shastri.html ಕಾಣಬಹುದು. ಇವರ ಮಾತುಗಳನ್ನು ಹುಡುಕಿದೆನಾದರೂ ಅದು ಭಾರತ-ಪಾಕಿಸ್ತಾನ ಯುದ್ಧಕ್ಕೆ ಸಂಬಂಧಪಟ್ಟಿದ್ದು. ಅದಕ್ಕೆ ಹಾಗಾಗಿ ಅವರ ಮಾತುಗಳನ್ನು ಇಲ್ಲಿ ಉಲ್ಲೇಖಿಸಲು ಆಗಲಿಲ್ಲ. ಕ್ಷಮಿಸಿ.

++++++++++++++

ಇಂದು ಸೆಪ್ಟೆಂಬರ್‍ ೨೭, ಆತನ ಜನ್ಮದಿನ

ಹುತಾತ್ಮ ಭಗತ್‌ ಸಿಂಗ್‌ - ಇಂದು ಸೆಪ್ಟೆಂಬರ್‍ ೨೭, ಆತನ ಜನ್ಮದಿನ. ಇಂದಿಗೆ ೧೦೪ನೇ ವರ್ಷವಾಗುತ್ತಾ ಬಂದಿದೆ. ಭಾರತ ದೇಶ ಕಂಡ ಯುವ ಕ್ರಾಂತಿಕಾರಿ, ಹುತಾತ್ಮ ಭಗತ್‌ ಸಿಂಗ್ ಜನ್ಮತಾಳಿದ್ದು ಲೈಲಾಪುರ ಜಿಲ್ಲೆಯ ಬಾಂಗ (ಈಗಿನ ಪಾಕಿಸ್ತಾನ) ಎಂಬಲ್ಲಿ. ಭಗತ್ ಸಿಂಗನ ಕುಟುಂಬ ಸ್ವಾತಂತ್ರ್‍ಯಹೋರಾಟಗಾರರ ಕುಟುಂಬ. ಈತನು ಸರ್ದಾರ್‌ ಕಿಷನ್ ಸಿಂಗ್ ಮತ್ತು ವಿದ್ಯಾವತಿ ಇವರ ಮೂರನೇ ಮಗ. ಇವನ ಚಿಕ್ಕಪ್ಪಂದಿರೂ ಸಹ ಸ್ವಾತಂತ್ರ್‍ಯ ಹೋರಾಟಗಾರರಾಗಿದ್ದರು.

ಭಗತ್ ಸಿಂಗನ ನುಡಿಮುತ್ತು: "If the deaf are to hear, the sound has to be very loud. When we dropped the bomb, it was not our intention to kill anybody. We have bombed the British Government. The British must quit India and make her free."

ಇಂತಹ ಯುವ ಹುತಾತ್ಮನಿಗೆ ಭಾರತೀಯರೆಲ್ಲರ ನಮನಗಳನ್ನು ಅರ್ಪಿಸೋಣ. ಆತನ ವಿಚಾರಧಾರೆ, ಆತನ ಧೀ:ಶಕ್ತಿ, ದೇಶಪ್ರೇಮ, ಪ್ರಾಮಾಣಿಕತೆ, ಸಾಹಸ, ಇಂದಿನ ಯುವಜನಾಂಗದಲ್ಲಿಯೂ ಮೂಡಿಬರಲಿ.

ಹುತಾತ್ಮ ಭಗತ್ ಸಿಂಗನ ಪೂರ್ಣಪಾಠಕ್ಕೆ ಇಲ್ಲಿಗೆ ಭೇಟಿಕೊಡಿ
http://www.shahidbhagatsingh.org/index.asp?linkid=1

ಬಂಗಾರದ ಮನುಷ್ಯನ ೧೫೦ನೇ ಜನ್ಮದಿನ

ಬಂಗಾರದ ಮನುಷ್ಯ ಚಿತ್ರದಲ್ಲಿನ ಹಾಡಿನಲ್ಲಿ ಸರ್‍ ಎಂ. ವಿಶ್ವೇಶ್ವರಯ್ಯನವರನ್ನು ನೆನಪಿಸಿಕೊಂಡು ಬರೆದಿರುವ ಸಾಲು ಎಂದಿಗೂ ಸ್ಫೂರ್ತಿದಾಯಕವಾದುದು ಎನ್ನಬಹುದು.

"ವಿಶ್ವೇಶ್ವರಯ್ಯ ಶ್ರಮಪಡದಿದ್ದರೆ ,
ಕನ್ನಂಬಾಡಿಯ ಕಟ್ಟದಿದ್ದರೆ..
ಆಗುತ್ತಿತ್ತೆ ಈ ನಾಡು ?
ಬಂಗಾರ ಬೆಳೆವ ಹೊನ್ನಾಡು...

ಶತಾಯುಷಿ ಭಾರತ ರತ್ನ ಸರ್‍ ಎಂ.ವಿ. ಎಂದೇ ಖ್ಯಾತರಾದ ಅವರಿಂದ ಅನೇಕ ಸಾಮಾಜಿಕ ಕಾರ್ಯಗಳು ಆಗಿವೆ. ಅದರಲ್ಲಿಯೂ ಅಣೆಕಟ್ಟುಗಳು, ವಿದ್ಯುತ್‌ಚ್ಛಕ್ತಿ, ಬ್ಯಾಂಕ್‌, ಕೈಗಾರಿಕೆಗಳು, ಶಿಕ್ಷಣ ಸಂಸ್ಥೆಗಳು ಹೀಗೆ ಹತ್ತು ಹಲವು ಕೆಲಸಗಳು ಈ ಭಾರತದೇಶಕ್ಕೆ ಅವರ ಕೊಡುಗೆಯಾಗಿವೆ.

ಇಂದಿಗೆ ಅವರು ಜನಿಸಿ (ಸೆಪ್ಟೆಂಬರ್‍ ೧೫, ೧೮೬೦) ೧೫೦ ವರ್ಷವಾಗುತ್ತಿದೆ. ಅಂತಹ ಮಹಾನ್‌ಚೇತನವನ್ನು ನೆನವ ದಿನವನ್ನಾಗಿ `ಇಂಜಿನಿಯರ್‍ಸ್ ದಿನ' ಎಂಬುದಾಗಿ ಕರೆದು ವಿವಿಧ ಸಾಮಾಜಿಕ, ಸಾಂಸ್ಕೃತಿಕ, ಶೈಕ್ಷಣಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತಿದೆ.

ಅವರ ಜೀವನಾದರ್ಶಗಳು ನಮ್ಮ ಯುವಪೀಳಿಗೆಗೆ ಸದಾ ಸ್ಫೂರ್ತಿಯುತವಾಗಿರಲಿ. ಹೊಸಹೊಸ ಆವಿಷ್ಕಾರಗಳಿಗೆ ಬುನಾದಿಯಾಗಿ ಭಾರತಮಾತೆಯು ಮತ್ತಷ್ಟು ಪ್ರಜ್ವಲಿಸಲಿ ಎಂದು ಆಶಿಸೋಣ.

ಜನನ: ಸೆಪ್ಟೆಂಬರ್‍ ೧೮೬೦
ಮರಣ: ಏಪ್ರಿಲ್‌ ೧೨, ೧೯೬೨ (೧೦೨ ವರ್ಷಗಳು)

ಚಿತ್ರ ಕೃಪೆ: ಗೂಗಲ್ ಹುಡುಕಾಟದಲ್ಲಿ ಮಂಡ್ಯ.ನಿಕ್.ಇನ್

ಶಿಕ್ಷಕರ ದಿನಕ್ಕಾಗಿ ಹೀಗೊಂದು ನೆನಪು...

ಗುರುವಿಲ್ಲದೆ ಗುರಿಯ ಸೇರುವುದು ಅಸಾಧ್ಯ!

ಗುರುವೆಂದರೆ ಒಂದು ಆದರ್ಶ, ಸಂಸ್ಕೃತಿ, ವಿದ್ಯೆ, ವಿನಯ ಇತ್ಯಾದಿ ಎಲ್ಲವನ್ನೂ ಬಿಂಬಿಸುವಂತಹವನು...

ದ್ರೋಣಾಚಾರ್ಯರ ಪ್ರತಿಮೆಯನ್ನೇ ತನ್ನ ಗುರುವಾಗಿ ಪಡೆದು ಧನುರ್ವಿದ್ಯಾಧರನಾದವನು ಏಕಲವ್ಯ.

ಪ್ರಾಥಮಿಕ ಶಾಲೆಯಿಂದ, ಕಾಲೇಜು, ಉದ್ಯೋಗ ಹೀಗೆ ಎಲ್ಲೆಡೆಯೂ ಶಾಲೆಯಲ್ಲಿದ್ದ, ಅಕ್ಷರ ಕಲಿಸಿದ, ಶಿಕ್ಷಿಸಿದ, ಬುದ್ಧಿ ಹೇಳಿದ, ಸಂತೈಸಿದ ಗುರುಗಳು (ಶಿಕ್ಷಕಿಯರೇ ಹೆಚ್ಚು) ಆಗಾಗ ನೆನಪಿಗೆ ಬರುತ್ತಿರುತ್ತಾರೆ.

ಹೀಗೆಯೇ ೪-೫ ತಿಂಗಳ ಹಿಂದೆ ಈ ಅಂತರ್ಜಾಲದ ಒಂದು ತಾಣದಲ್ಲಿ, ನನ್ನ ಪ್ರಾಥಮಿಕ ಶಾಲಾ ಶಿಕ್ಷಿಯೊಬ್ಬರ ಛಾಯಾಚಿತ್ರವೊಂದು ಸಿಕ್ಕಿತು. ಆಗ ನಿಜಕ್ಕೂ ಖುಷಿಯಾಯಿತು. ಏಕೆಂದರೆ, ಈ ಹಿಂದೆ ಅವರ ಮತ್ತು ಅವರ ಸಹಶಿಕ್ಷಕಿಯರೆಲ್ಲ ನಮಗೆ ಬೋಧಿಸಿದವರೇ ಆಗಿದ್ದಾರೆ...

• ನನಗೂ ಶಾಲೆ ಬಿಟ್ಟ ಮೇಲೆ, ಕಾಲೇಜು, ಕೆಲಸ ಹೀಗೆ ಬೇರೆಬೇರೆ ಬ್ಯುಸಿ (??) ಕಾರಣಗಳಿಂದಾಗಿ ಮತ್ತೆ ಶಾಲಾ ವಲಯಕ್ಕೆಹೋಗಲು ಆಗಿರಲಿಲ್ಲ. ಹೋದರೂ ಅದು ಭಾನುವಾರವಾಗಿದ್ದರೆ ಏನುಪಯೋಗ? ಕೆಲವು ಬಾರಿ ಮಾತ್ರ ದಾರಿಯಲ್ಲಿ ಸಿಕ್ಕಟೀಚರ್ ಜೊತೆ ಒಂದೆರಡು ಮಾತು ಅಥವಾ ನಮಸ್ಕಾರ ಹೇಳಿದ್ದಿರಬಹುದು ಅಷ್ಟೆ...

• ಒಂದೆರಡು ಬಾರಿ ಕೆಲವೇ ಶಿಕ್ಷಕಿಯರ ಮನೆಗಳಿಗೆ ಸ್ನೇಹಿತರೊಡಗೂಡಿ ಭೇಟಿಯಿತ್ತದ್ದಿದೆ. ಅದೂ ಬಹಳ ವರ್ಷಗಳ ಹಿಂದೆ.

• ನಮಗಿದ್ದ ಹೆಡ್ ಮೇಡಂ (ಈಗಿಲ್ಲ)ರವರನ್ನು ಕಂಡರೆ ದಿಗಿಲು ಇತ್ತು ಎಲ್ಲರಿಗೂ. ಆದರೆ ಅವರ ಪ್ರೀತಿತುಂಬಿದ ನುಡಿಗಳು ನಮಗೆಮಾತೇ ಹೊರಡದಂತೆ ಮಾಡುತ್ತಿದ್ದವು. ಅಲ್ಲದೇ ಅವರ ಮನೆಯಲ್ಲಿಯೇ ಒಂದು ಮತ್ತು ಎರಡನೇ ತರಗತಿ ನಡೆಯುತ್ತಿದ್ದವು. ೩-೭ರವರೆಗೆ ಬೇರೊಂದು ಸ್ಥಳದಲ್ಲಿ ವಿಶಾಲ ಕಟ್ಟಡವನ್ನು ಕಟ್ಟಿಸಿ ಅಲ್ಲಿಗೆ ವಿದ್ಯಾರ್ಥಿಗಳು ಬರುವಂತೆ ಮಾಡಿದ್ದರು. ಶಾಲಾವಾರ್ಷಿಕೋತ್ಸವ ಒಂದು ಭರ್ಜರಿಯಾಗಿ ನಡೆದಿತ್ತು. ಶಾಲಾ ಫೀಜು ಕಟ್ಟಲು ಆಗದೇ ಇದ್ದಾಗ ನಮ್ಮ ಪರೀಕ್ಷಾ ಫಲಿತಾಂಶತಿಳಿಸುವುದಿಲ್ಲ ಎಂದು ವಾಪಸ್ಸು ಮನೆಗೆ ಕಳಿಸುತ್ತಿದ್ದರು. ಮುಂದಿನ ತರಗತಿಗೆ ಸೇರುತ್ತಿದ್ದೆವು (ಫೀ ಮುಂದಿನ ತರಗತಿಯ ಜೊತೆಗೆಸೇರಕೊಳ್ಳುತ್ತಿತ್ತು, ಕೆಲವೊಮ್ಮೆ).

• ಇನ್ನು ಅವರ ಪತಿಯರವರು ಶಾಲಾ ಸೆಕ್ರೆಟರಿಯಾಗಿದ್ದರು. ಅವರಿಗೂ ಅಷ್ಟೆ ಮಕ್ಕಳೆಂದರೆ ಅತೀವ ಪ್ರೀತಿ, ವಾತ್ಸಲ್ಯ. ಸ್ವಾತಂತ್ರ್ಯದ ದಿನದ ಹೋರಾಟದ ಕಥೆಗಳನ್ನು ನಮಗೆಲ್ಲ ಹೇಳುತ್ತಿದ್ದರು. ದಿನವೂ ಬೈಸಿಕಲ್ಲಿನಲ್ಲಿ ಅವರು ಬರುವಾಗ ಶಾಲಾಮಕ್ಕಳು ಸಿಕ್ಕರೆ ಅವರ ಚೀಲ ಅಥವಾ ಮಕ್ಕಳನ್ನೆ ಸೈಕಲ್ಲಿನಲ್ಲಿ ಕೂರಿಸಿ ಕರೆತರುತ್ತಿದ್ದದ್ದೂ ಉಂಟು. ಇವೆಲ್ಲ ನೆನಪುಗಳು ಸದಾಕಾಡುತ್ತವೆ.

• ಒಮ್ಮೆ ಮೊದಲ ಬಾರಿಗೆ ತಿರುಪತಿಗೆ ಹೋಗಿ ಬಂದಾಗ ನನ್ನ ತಲೆ ಗುಂಡಗಾಗಿತ್ತು. ಟೋಪಿ ಧರಿಸಿದ್ದೆ. ಕ್ಲಾಸಿನಲ್ಲಿ ಟೋಪಿಹಾಕ್ಕೋತೀಯಾ ಅಂತ ಆನ್ವಟಿ ಎಂಬ ಹಿಂದಿ ಟೀಚರ್‌ ಗದರಿದ್ದರು. ವಿಧಿಯಿಲ್ಲದೇ ಟೋಪಿ ತೆಗೆದಿದ್ದೆ...

• ಇನ್ನೊಮ್ಮೆ ಶಾಲೆಯಲ್ಲಿ ಆಟಕ್ಕೆಂದು ಬಿಟ್ಟಾಗ - ನಮ್ಮ ಸಹಪಾಠಿಯರೊಂದಿಗೆ ಆಡುತ್ತಾ... ಆಟದಲ್ಲಿ ಸೋತವರು ಒಂದು ಕಾಲಿನಲ್ಲಿಕುಂಟುತ್ತಾ ಅವರು ಹೇಳಿದಷ್ಟು ದೂರ ಹೋಗಬೇಕು ಅಥವಾ ಒಂದಿಪತ್ತು ಅಡಿ ಬೆನ್ನಮೇಲೆ ಕೂರಿಸಿಕೊಂಡ ಹೋಗಬೇಕಿತ್ತು.. ಇದುಒಬ್ಬ ಟೀಚರ್‍ ಗಮನಕ್ಕೆ ಬಂದು ಎಲ್ಲರಿಗೂ ಗದರಿದ್ದಲ್ಲದೇ... ಕಟ್ಟಿಗೆಯೇಟಿನ ಶಿಕ್ಷೆ ಕೊಟ್ಟಿದ್ದರು...

• ಇನ್ನೊಬ್ಬರು ದೇವಿಕಾ ಟೀಚರ್‌.. ಇವರು ನಮಗೆ ೬-೭ ನೇ ತರಗತಿಯಲ್ಲಿ ಪಾಠ ಹೇಳಿಕೊಡುತ್ತಿದ್ದರು. ಇವರ ವಿಷಯ ಇಂಗ್ಲಿಷ್ಮತ್ತು ವಿಜ್ಞಾನ... ಒಮ್ಮೆ ಇಂಗ್ಲಿಷ್ನ ಒಂದು ಪದದ ಅರ್ಥ ಕೇಳಿದರು ಎಲ್ಲ ಮಕ್ಕಳಿಗೂ... ಆದರೆ ಕೆಲವು ಪರ್ಯಾಯ ಪದಗಳುತಿಳಿಯುತ್ತಿಲ್ಲ. ಕ್ರೌನ್‌ ಪದದ ಅರ್ಥ - ಕಿರೀಟ ಎಂಬುದು ಸಾಮಾನ್ಯವಾಗಿ ತಿಳಿದಿದ್ದೆವು. ಹುಂಜದ ತಲೆಯ ಮೇಲಿನದಕ್ಕೆ ಉತ್ತರಕೇಳಿದ್ದರು... ನಾನು ತುರಾಯಿ ಎಂದು ಹೇಳಿದ್ದೆ. ಅಂದಿನಿಂದ ವಿಶೇಷ ಅಕ್ಕರೆ ನನಗೆ ತೋರುತ್ತಿದ್ದರು. ಕೆಲವೊಮ್ಮೆ ವಿಜ್ಞಾನದನೋಟ್ಸ್ ಬರೆದುಕೊಟ್ಟಿದ್ದರು.

• ಇನ್ನೊಬ್ಬರು ಎಮಿಲಿ ಲೋಬೋ. ಇವರೆಂದರೆ ಕಾಲೇಜು ಬಿಟ್ಟು ಕೆಲಸಕ್ಕೆ ಸೇರಿದ್ದರೂ ಒಂಥರಾ ಭಯ (?) ಇತ್ತು ಎನ್ನಬಹುದು. ಅವರೊಮ್ಮೆ ಕಾಣಿಸಿಕೊಂಡರೆ ಇಡೀ ತರಗತಿ ಗಪ್ಚುಪ್‌. ನಮಗೆ ಗಣಿತದ ಟೀಚರ್‌ ಆಗಿದ್ದರು. ಮಕ್ಕಳಲ್ಲಿ ಭಾಷಾ ಉಚ್ಛಾರಣೆಯಲ್ಲಿತಪ್ಪು ಕಂಡರೆ ಹೊಡೆತ ಬೀಳುತ್ತಿತ್ತು. ಸರಿಯಾಗಿ ಕಲಿವವರೆಗೂ ಬಿಡುತ್ತಿರಲಿಲ್ಲ. ಇದೀಗ ಮುಖ್ಯೋಪಾಧ್ಯಾಯಿನಿಯಾಗಿದ್ದಾರೆ.. ಕಳೆದೆರಡು ತಿಂಗಳ ಹಿಂದೆ ಅವರನ್ನು ಭೇಟಿ ಮಾಡಿದ್ದೆ. ಜೊತೆಗೆ ಪ್ರೌಢಶಾಲಾ ಟೀಚರುಗಳೂ ಸಿಕ್ಕಿದ್ದರು. ಖುಷಿಯಾಗಿತ್ತು.

• ಮನೋರಮಾ - ಇವರಿಗೆ ಮಕ್ಕಳ ಕಂಡರೆ ತುಂಬಾ ಸಂತಸ. ನಾವೆಲ್ಲ ಸ್ನೇಹಿತರು ಸುಮಾರು ವರ್ಷಗಳ ನಂತರ ಮನೆಗೆಹೋದಾಗ `ನನ್ನ ಮಕ್ಕಳು ಬಂದಿದ್ದಾರೆ' ಎಂದು ಕೊಬ್ಬರಿ ಮಿಠಾಯಿ ಮಾಡಿಕೊಟ್ಟಿದ್ದರು. ಏಯ್! ಎಂದರೆ ಸಾಕು ತರಗತಿಯೆಲ್ಲನಿಶ್ಶಬ್ದವಾಗುತ್ತಿತ್ತು. ಕಿಟಕಿ ಸರಳಿನಿಂದ ಅದೆಷ್ಟೋ ಹೊಡೆತ ತಿಂದದ್ದಿದೆ (ಎಲ್ಲರೂ ಎನ್ನಬಹುದು). ಇವನ್ನೆಲ್ಲ ಅವರೊಡನೆ ಇತ್ತೀಚೆಗೆನೆನಪಿಸಿಕೊಂಡೆ...

• ಪ್ರಮೀಳಾ ಎಂಬುವವರು ಬರವಣಿಗೆ (ಕಾಪಿರೈಟಿಂಗ್) ಎಷ್ಟು ಕೊಡುತ್ತಿದ್ದರೆಂದರೆ... ಅಬ್ಬಬ್ಬಾ... ಬರೆಯಲು ಆಗದಷ್ಟು... ೧ ರಿಂದಸಾವಿರ, ೫ ಸಾವಿರ ಹೀಗೆ... ಬರೆಯದಿದ್ದಾಗ ಬೆಂಚಿನ ಮೇಲೆ ನಿಲ್ಲುವ ಶಿಕ್ಷೆ.. ಅದೆಷ್ಟು ಮಂದಿ ನಿಲ್ಲುತ್ತಿದ್ದೆವೋ! ಪದ್ಮಾವತಿಎಂಬುವರು ಹಿಂದಿ, ಸಮಾಜ (ನಾವು ಹೈಸ್ಕೂಲಿನಲ್ಲಿದ್ದಾಗ ನಮ್ಮನ್ನಗಲಿದರು) ಪಾಠಮಾಡುತ್ತಿದ್ದರು. ತುಂಬಾ ಚೆನ್ನಾಗಿ ಇತಿಹಾಸತಿಳಿಸುತ್ತಿದ್ದರು. ಆಗೆಲ್ಲ ಇಸವಿಗಳ ನೆನಪು ಇಟ್ಟುಕೊಳ್ಳಬೇಕಿತ್ತು... (ಈಗ ಎಲ್ಲ ಮರೆತಿದೆ).

• ಇನ್ನು ಲಲಿತಾ, ಗಿರಿಜಾ, ಪ್ರೇಮ ಹೀಗೆ ಇಬ್ಬಿಬ್ಬರು ಟೀಚರ್ ಇದ್ದರು. ಸಿದ್ಧಮ್ಮ, ಸರಳ, ಸುಧಾ, ಲಕ್ಮ್ಮೀ ಹೀಗೆ ಬಹಳ ಟೀಚರ್ಇದ್ದರು. ಅವರೆಲ್ಲರ ಪ್ರೀತಿ ಆಗ ಅರಿಯಲಾಗುತ್ತಿರಲಿಲ್ಲ ಅಷ್ಟೇ...‍
  

• ಪಿ.ಟಿ. ಮಾಸ್ತರು ಇದ್ದರು. ಅವರಿಗೆ ಕೇಸವ ಎಂದರೇ ಒಂಥರಾ ಖುಷಿ.... ಶಕಾರ ಬರುತ್ತಿರಲಿಲ್ಲ.... ನಾವೆಲ್ಲ ಒಮ್ಮೆ ಕೇಸವ ಎಂದುಹೆಸರ ಹೇಳಿ ನಕ್ಕಿದ್ದಾಗ ಒದೆ ಬಿದ್ದಿತ್ತು. ಮೊನ್ನೆ ಶಾಲೆಗೆ ಹೋದಾಗ ಸಿಕ್ಕಿದ್ದರು. ಈಗ ೫೦+ ಅವರಿಗೆ ನನ್ನನ್ನ ಗುರುತು ಹಿಡಿದರು. ನಮ್ಮೊಡನಿದ್ದ ಗೆಳೆಯರನ್ನೆಲ್ಲ ಕೇಳಿದರು... ಖುಷಿಯಾಯಿತು..

• ಇನ್ನು ನಮ್ಮ ಹೆಡ್ ಮೀದ ಉಷಾರಾವ್ ಒಬ್ಬರು ಇಂಗ್ಲಿಷ್‌ ಪಾಠ ಮಾಡುತ್ತಿದ್ದರು. ಫುಲ್ ಇಂಗ್ಲಿಷ್‌. ನಮಗೆ ಉಹೂಂ! ಅರ್ಥಆಗುತ್ತಿರಲಿಲ್ಲ. ಆದರೆ, ನಂತರ ಅರ್ಥವಾಗಿಸುತ್ತಿದ್ದರು. ಪದಗಳ ಅರ್ಥ, ಸ್ಪೆಲ್ಲಿಂಗ್ ಎಲ್ಲ ತಿದ್ದಿ ತೀಡಿ ಕಲಿಸಿದವರು.

• ಒಮ್ಮೆ ನಾವೆಲ್ಲ ಮಕ್ಕಳೂ (೫-೬ ಮಕ್ಕಳು ಅಂದರೆ ತಂಗಿಯರು, ಚಿಕ್ಕಮ್ಮನ ಮಕ್ಕಳು ಹೀಗೆ) ಶಾಲೆಯಲ್ಲಿ ಮಧ್ಯಾಹ್ನ ಸುಮ್ಮನೇಅಲ್ಲಿಗೆ ಹೋಗಬೇಕು ಹೀಗೆ ಏನೋ ನೆಪಹೇಳಿ ಮನೆಮಂದಿಯ ಜೊತೆ ಚಲನಚಿತ್ರಕ್ಕೆ ಹೋಗಿದ್ದೆವು. ಅದು ಹೇಗೋ ಅವರಿಗೆತಿಳಿದುಬಿಡುತ್ತಿತ್ತು. ಒಮ್ಮೆ ಹೀಗೆ ಹೋಗಿರುವಾಗ ಅದೇ ಚಲನ ಚಿತ್ರ ನೋಡಲು ಕೆಲವು ಟೀಚರ್ ಬಂದಿದ್ದರು. ಅದೂಸಾಲದೆಂಬಂತೆ ನಮ್ಮ ಪಕ್ಕದಲ್ಲಿಯೇ (ಆಗೆಲ್ಲ ಟೆಂಟು ಸಿನಿಮಾ ನೆಲವೇ ಜಾಸ್ತಿ ಹೋಗುತ್ತಿದ್ದದ್ದು) ಕುಳಿತಿರಬೇಕೆ? ಸಿನಿಮಾ ಹೆಸರೂನೆನಪಿಲ್ಲ (ಬಹುಶ: ಕರುಳಿನ ಕರೆ ಅಥವಾ ದ್ವಾರಕೀಶ್ ಚಿತ್ರ ಗುರು ಶಿಷ್ಯರು ಇರಬೇಕು). ಮಾರನೇ ದಿನ ಇದೇ ಶಾಲೆಯಲ್ಲಿವಿಷಯವಾಗಿತ್ತು... ಹಹಹ್ಹ...

‍
ಹೈಸ್ಕೂಲಿನ ಟೀಚರ್‍ಸ್ ಜೊತೆಯ ಒಡನಾಟ ತುಂಬಾ ಕಡಿಮೆ (ಕೇವಲ ಮೂರು ವರ್ಷಗಳು). ಆದರೂ ಕೆಲವೇ ಕೆಲವರು ಮತ್ತೆ ಮತ್ತೆ ನೆನಪಾಗುತ್ತಾರೆ. ಕೆಲವರು ಆಗೀಗ ಸಿಕ್ಕದ್ದಾರೆ.. ಸಿಕ್ಕುತ್ತಿರುತ್ತಾರೆ...

• ಎಲ್ಲಕಿಂತ ಮುಖ್ಯವಾಗಿ ನಮಗೆಲ್ಲಾ ಒಂದು ವಿದ್ಯೆಯನ್ನು ಧಾರೆಯೆರೆಯಲು ಶ್ರಮ ಪಟ್ಟ ಆ ಹಿರಿಯ ವೃಂದಗಳಿಂದ ಭಾಷಾಶುದ್ಧಿ, ಉತ್ತಮ ಗುಣಗಳನ್ನು ಕಲಿತಿದ್ದೇವೆ. ಅವರೆಲ್ಲರ ನೆನಪುಗಳು ಆಗಾಗ ಬರುತ್ತಿರುತ್ತದೆ. ಕೆಲವರು ನಮ್ಮೊಂದಿಗಿಲ್ಲ. ಕೆಲವರು ಇನ್ನೂವೃತ್ತಿಯಲ್ಲಿದ್ದಾರೆ, ಮತ್ತೆ ಕೆಲವರು ನಿವೃತ್ತರಾಗಿದ್ದಾರೆ.

ಇದೆಲ್ಲ ನೆನಪಿಸಿಕೊಂಡಾಗ ನಾವಿಷ್ಟರ ಮಟ್ಟಿಗೆ ಬೆಳೆಯಲು ಇಂತಹ ಗುರುಗಳಲ್ಲದೇ ಇನ್ಯಾರಿಂದ ದಾರಿತೋರಲು ಸಾಧ್ಯ? ಮನೆಯೇ ಮೊದಲ ಶಾಲೆಯಾದರೂ.. ನಂತರದ ಶಾಲೆ ಗುರುವಿನೊಡನೆ ಕಳೆದ, ಬರೆದ, ಕೂಡಿದ ಕ್ಷಣಗಳು ಅದ್ಭುತ. ಅವನ್ನೆಲ್ಲ ಮರೆಯಲುಂಟೇ? ಗುರುವಿಲ್ಲದ ಮನೆಯಿಲ್ಲ, ಗುರಿಯಿಲ್ಲದ ಬದುಕಿಲ್ಲ... ಇದ್ದರೂ ಒಂದು ಗುರು-ಗುರಿ ಇರಲೇಬೇಕು... ಇರುತ್ತದೆ. ಅದರ ವ್ಯಾಪ್ತಿ ಊಹೆಗೆ ಮೀರುವಂತಹುದು.

ಇಂತಹ ಗುರುಗಳನ್ನು ಎಲ್ಲರೂ ಒಂದಲ್ಲಾ ಒಂದು ವಿಧದಲ್ಲಿ ಪಡೆದಿರುತ್ತಾರೆ. ಹಾಗೆಯೇ ಉತ್ತಮ ಶಿಷ್ಯರನ್ನೂ ಗುರುಗಳು ಪಡೆದರೆ... ಅದರ ಪರಿಧಿಯೇ ಬೇರೆ ಇರುತ್ತದೆ. ಹಾಗಾಗುವುದು ಅಪರೂಪ...

ಗುರುವಿನ ಗುಲಾಮನಾಗುವ ತನಕ ದೊರೆಯದಣ್ಣ ಮುಕುತಿ ಎಂದರು ದಾಸರು... ಆದರೆ ಇಂದಿನ ದಿನಗಳಲ್ಲಿ ಗುರುವೇ ನೀ ಗುಲಾಮನಾಗಿರುವ ತನಕ ಸಂಬಳವಿಲ್ಲ, ಉಂಬಳವಿಲ್ಲ.. ಎನ್ನುವವರೂ ಇದ್ದಾರೆ.. ಏನೆನ್ನಬೇಕು ಇದಕ್ಕೆ???

ಭಾರತದ ರಾಷ್ಟ್ರಪತಿಯಾಗಿದ್ದ, ಶಿಕ್ಷಣತಜ್ಞ ಡಾ|| ಸರ್ವಪಲ್ಲಿ ರಾಧಾಕೃಷ್ಣನ್‌ರವರ ಜನ್ಮ ದಿನ (ಸೆಪ್ಟೆಂಬರ್‍ ೫, ೧೮೮೮ - ೧೯೭೫). ಈ ದಿನವಾದರೂ ಗುರುಗಳನ್ನು ನೆನಯದಿದ್ದರೆ... ಹೇಗೆ? ಹಾಗೆಂದುಕೊಳ್ಳುತ್ತಲೇ ನನ್ನ ನೆನಪಿನಲ್ಲುಳಿದವನ್ನು ಇಲ್ಲಿ ನಿಮ್ಮೊಡನೆ ಹಂಚಿಕೊಂಡೆ. (ಇನ್ನೂ ಇವೆ... ಸಾಧ್ಯವಾದರೆ ಆಗಾಗ ಬರೆಯುತ್ತೇನೆ ಅಂದುಕೊಂಡಿರುವೆ...)

ಸನ್ಮಾರ್ಗ, ವಿದ್ಯೆ, ಭಾಷೆ, ಸಂಸ್ಕೃತಿ ಇವುಗಳನ್ನೆಲ್ಲ ಕಲಿಸಿದ ಹಾಗೂ ನಮ್ಮೆಲ್ಲರ ಮನದಲ್ಲಿ ಮನೆಮಾಡಿರುವ ಎಲ್ಲ ಗುರುಗಳಿಗೂ ಮನ:ಪೂರ್ವಕ ನಮಸ್ಕಾರಗಳು.

ಇಲ್ಲಿ ನಮ್ಮ ಯಾವುದೇ ಶಿಕ್ಷಕಿ/ಕ ಇವರುಗಳಿಗೆ ನೋವಾಗದಿರುವಂತೆ ನೆನಪಿಸಿಕೊಂಡಿದ್ದೇನೆ ಎಂದುಕೊಂಡಿದ್ದೇನೆ. ತಪ್ಪಾಗಿದ್ದರೆ... ಕ್ಷಮೆಯಿರಲಿ, ಮಿಸ್!

-ಚಂದ್ರಶೇಖರ ಬಿ.ಎಚ್.

ಶ್ರೀಕೃಷ್ಣ ಜನ್ಮಾಷ್ಠಮಿಯ ಶುಭಾಶಯಗಳು

|| ಶ್ರೀ ಕೃಷ್ಣಾಷ್ಟಕಂ||

ವಸುದೇವ ಸುತಂ ದೇವಂ ಕಂಸ ಚಾಣೂರಮರ್ದನಂ|
ದೇವಕೀ ಪರಮಾನಂದಂ ಕೃಷ್ಣಂ ವಂದೇ ಜಗದ್ಗುರುಂ ||೧||

ಅತಸೀಪುಷ್ಪ ಸಂಕಾಶಂ ಹಾರನೂಪುರ ಶೋಭಿತಂ |
ರತ್ನಕಂಕಣ ಕೇಯೂರಂ ಕೃಷ್ಣಂ ವಂದೇ ಜಗದ್ಗುರುಂ ||೨||

ಕುಟಿಲಾಲಕ ಸಂಯುಕ್ತಂ ಪೂರ್ಣ ಚಂದ್ರನಿಭಾನನಂ |
ವಿಲಸತ್ಕುಂಡಲ ಧರಂ ಕೃಷ್ಣಂ ವಂದೇ ಜಗದ್ಗುರುಂ ||೩||

ಮಂದಾರ ಗಂಧಸಂಯುಕ್ತಂ ಚಾರುಹಾಸಂ ಚತುರ್ಭುಜಂ |
ಬರ್ಹಿ ಪಿಂಛಾವ ಚೂಡಾಂಗಂ ಕೃಷ್ಣಂ ವಂದೇ ಜಗದ್ಗುರುಂ ||೪||

ಉತ್ಫುಲ್ಲ ಪದ್ಮ ಪತ್ರಾಕ್ಷಂ ನೀಲಜೀಮೂತ ಸನ್ನಿಭಂ |
ಯಾದವಾನಾಂ ಶಿರೋರತ್ನಂ ಕೃಷ್ಣಂ ವಂದೇ ಜಗದ್ಗುರುಂ ||೫||

ರುಕ್ಮಿಣೀ ಕೇಳಿಸಂಯುಕ್ತಂ ಪೀತಾಂಬರ ಸುಶೋಭಿತಂ |
ಅವಾಪ್ತ ತುಲಸೀಗಂಧಂ ಕೃಷ್ಣಂ ವಂದೇ ಜಗದ್ಗುರುಂ ||೬||

ಗೋಪಿಕಾನಾಂ ಕುಚದ್ವಂದ್ವ ಕುಂಕುಮಾಂಕಿತ ವಕ್ಷಸಂ |
ಶ್ರೀನಿಕೇತಂ ಮಹೇಷ್ವಾಸಂ ಕೃಷ್ಣಂ ವಂದೇ ಜಗದ್ಗುರುಂ ||೭||

ಶ್ರೀವತ್ಸಾಂಕಂ ಮಹೋರಸ್ಕಂ ವನಮಾಲಾ ವಿರಾಜಿತಂ |
ಶಂಖ ಚಕ್ರಧರಂ ದೇವಂ ಕೃಷ್ಣಂ ವಂದೇ ಜಗದ್ಗುರುಂ ||೮||

ಕೃಷ್ಣಾಷ್ಟಕಮಿದಂ ಪುಣ್ಯಂ ಪ್ರಾತರುತ್ಥಾಯ ಯ: ಪಠೇತ್ |
ಕೋಟಿ ಜನ್ಮ ಕೃತಂ ಪಾಪಂ ಸ್ಮರಣೇನ ವಿನಶ್ಯತಿ ||೯||

|| ಇತಿ ಶ್ರೀ ಕೃಷ್ಣಾಷ್ಟಕಂ ಸಂಪೂರ್ಣಂ ||

ಎಲ್ಲರಿಗೂ ಶ್ರೀಕೃಷ್ಣ ಜನ್ಮಾಷ್ಠಮಿಯ ಶುಭಾಶಯಗಳು

ಬನ್ನಿ ಭಾರತೀಯರೇ...

ಅಮ್ಮಾ.. ಅಮ್ಮಾ...

ಅಮ್ಮಾ.. ಅಮ್ಮಾ...

ಎರಡಕ್ಷರದಲಿ ಕರೆವೆ ನಿನ್ನನು
ಅಮ್ಮಾ.. ಅಮ್ಮಾ...
ನೀ ಕಂಡೆ ಆನಂದ ಅದರಲಿ
ಅಮ್ಮಾ.... ಅಮ್ಮಾ...

ನಿನ್ನ ಪ್ರೀತಿ ವಾತ್ಸಲ್ಯ
ಗಗನದೆತ್ತರ
ಅದಕಿಲ್ಲ ನನ್ನ ಉತ್ತರ...

ಕಿವಿಗೊಡಲಿಲ್ಲ ನಿನ್ನ
ಭವಿತವ್ಯದ ನುಡಿಗಳಿಗೆ
ಮೂಕವಾಗಿದೆ ಮನ
ನೊಂದಿದೇ ಈಗ...

ಒಂದಿನಿತು ಪೆಟ್ಟಾದರೂ
ನೀ ಮರುಗುತಿದ್ದೆ
ಅರಿಯಲಾರದೆ ಹೋದ
ನಾನೆನಿತು ಪೆಟ್ಟುಕೊಟ್ಟೆನೋ
ನಿನಗೆ...

ಪದ ನುಡಿವಾಗ ನಡೆವಾಗ
ತಡವರಿಸಿದಾಗ
ಆಸರೆಯಾಗಿ ನೀ ಬರುತಿದ್ದೆ
ಅಹಂ ಎಂಬ ನುಡಿ ನಡೆಯ ಕಲಿತ
ನಾನೇಕೆ ಸನ್ನಡತೆ ಮರೆತೆ...
ಅಮ್ಮಾ... ಅಮ್ಮಾ....

ನಾ ಬಿದ್ದಾಗ ದಾರಿ ತಪ್ಪಿದಾಗ
ಕೈ ಹಿಡಿದು ಊರುಗೋಲಾದೆ
ಊರುಗೋಲಾಗಬೇಕಿದ್ದ ನಾ
ಏಕೆ ನಿನ್ನ ದೂಡಿದೆ...

ನಾನೆಷ್ಟೆ ಪ್ರಶ್ನಿಸಿದರೂ ನೀ
ಚೆಂದದಲಿ ಉತ್ತರಿಸುತಿದ್ದೆ
ನೀ ಕೇಳಿದಾ ಪ್ರಶ್ನೆಗೆ
ನಾ ಸಹನೆ ಕಳೆದುಕೊಂಡಿದ್ದೆ...

ಛೆ... ನಾನೆಂತಹ ದುಷ್ಟ...
ಅರಿಲಾರದೆ ಹೋದೆ
ನಿನ್ನ ಮನಸಿನಾ ಕಷ್ಟ...
ನಾ ಅಮ್ಮಾ.. ಎಂದಾಗ
ನೀ ಪಡುವೆ ಸಂತೋಷ...
ಅಮ್ಮಾ ಎಂಬ ಕರೆಯ
ಕೇಳುವುದೇ ನಿನಗಿಷ್ಟ..

ಹೇಗೆ ಬಣ್ಣಿಸಲಿ ನಿನ್ನ
ಈ ಪ್ರೀತಿ ಮಮಕಾರ...
ಅಕ್ಷರಗಳಿಗೆ ಸಿಗದಿದರ ಸಾರ...
ಅಮ್ಮಾ.....ನಿನಗಿದೋ ನಮಸ್ಕಾರ...

ಎರಡಕ್ಷರದಲಿ ಕರೆವೆ ನಿನ್ನನು,
ಅಮ್ಮಾ.. ಅಮ್ಮಾ...
ನೀ ಕಂಡೆ ಆನಂದ ಅದರಲಿ
ಅಮ್ಮಾ....... ಅಮ್ಮಾ.....

- ಚಂದ್ರಶೇಖರ ಬಿ.ಎಚ್.
ಇದನ್ನು ತಿದ್ದಿತೀಡಿದವರಿಗೆ ಧನ್ಯವಾದಗಳು.

ಜೈ ಭಾರತ ಮಾತಾ! ಜೈ ಜವಾನ್‌!

ನಿನ್ನೆ ದಿನವೇ ನಮ್ಮ ನಮನವನ್ನು ಹಾಕಬೇಕಿತ್ತು. ಆದರೆ, ಅಂತರ್ಜಾಲದ ಕೊಂಡಿಯ ಸಮಸ್ಯೆಯಿಂದಾಗಿ ಬ್ಲಾಗಿನಲ್ಲಿ ಬರೆಯಲು ಆಗಲಿಲ್ಲ.. ಅದಕ್ಕಾಗಿ ವಿಷಾದಿಸುತ್ತೇನೆ. ಭಾರತ-ಪಾಕಿಸ್ತಾನ ನಡುವೆ ನಡೆದ ಕಾರ್ಗಿಲ್‌ ಯುದ್ಧ ೧೧ನೇ ವರ್ಷಕ್ಕೆ ಕಾಲಿಡುತ್ತಿದೆ.

ಭಾರತೀಯ ವೀರ ಯೋಧರ ತ್ಯಾಗ, ಬಲಿದಾನ, ಧೈರ್ಯ, ಸಾಹಸದಿಂದಾಗಿ ಈ ಯುದ್ಧವನ್ನು ಗೆದ್ದೆವು. ಅಂದು ಇಡೀ ಭಾರತದ ಸಮಸ್ತರೂ ವೀರಯೋಧರ ಜೊತೆಗಿದ್ದರು. ಇಲ್ಲಿ ಅರಳುತ್ತಿದ್ದ ಎಷ್ಟೋ ಯುವ ವೀರರು ತಮ್ಮ ತ್ಯಾಗ ಬಲಿದಾನಗಳಿಂದ ದೇಶವನ್ನು ಮತ್ತು ದೇಶವಾಸಿಗಳನ್ನು ರಕ್ಷಿಸಿದರು.

ವೀರ ಭಾರತೀಯ ಯೋಧರು `ವಿಜಯ' ಪತಾಕೆ ಹಾರಿಸಿ, ಈ ಯುದ್ಧದಲ್ಲಿ ವೀರಮರಣವನ್ನಪ್ಪಿದ, ಗಾಯಗೊಂಡ ಹಾಗೂ ಅವರ ಮನೆಯವರೆಲ್ಲರಿಗೂ ನಮ್ಮ ನಮನಗಳು. ಅವರೆಲ್ಲರೂ ಪ್ರಾತ:ಸ್ಮರಣೀಯರು. ಈ ಭಾರತಕ್ಕೆ ವೀರಯೋಧರನ್ನು ಕೊಟ್ಟ ತಾಯ್ತಂದೆಯರಿಗೆ ನಮ್ಮ ನಮನಗಳು. ಅವರೆಲ್ಲರಿಗೂ ದು:ಖವನ್ನು ಭರಿಸುವ ಶಕ್ತಿಯನ್ನು ಆ `ಶಕ್ತಿ' ಯು ಕೊಡಲಿ...

ಜೈ ಭಾರತ ಮಾತಾ! ಜೈ ಜವಾನ್‌!

* ನಮನ *

ಇಂಗಿ ಹೋಗುತಿದೆ ಇಂಗ್ಲೀಷಿನ ಮರುಭೂಮಿಯಲಿ
ನಿನ್ನ ಮಕ್ಕಳ ಪ್ರತಿಭಾ        (ಕುವೆಂಪು ವಿರಚಿತ)

ಬಿಡಿ ನೀವ್ ಆಂಗ್ಲ ವ್ಯಾಮೋಹ ಪೂರ್ಣ,
ಎಂದೇನಿಲ್ಲ, ಇರಲಿ ಪ್ರೀತಿ ಅದಕೂ, ಆದರೂ
ಬಿಡದಿರಲಿ ಕನ್ನಡ ತಾಯ್‍ ಮೇಲಿನ ಪ್ರೀತಿ, ಭಕುತಿ
ಎಂದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

ಏನು ಬಿಡು ಎಂದರೂ ಬಿಡಲೊಲ್ಲೆನಯ್ಯ
ಕನ್ನಡದ ಮಮತೆಯ ಬಿಡಲೊಲ್ಲೆನಯ್ಯ    (ಕುವೆಂಪು ವಿರಚಿತ)

ಕನ್ನಡವೇ ಸತ್ಯ, ಕನ್ನಡವೇ ನಿತ್ಯ ಎಂದು
ಉಸಿರಲಿ ಬೆರೆತ ಕನ್ನಡವನು ನಾನು
ಬಿಡಲೊಲ್ಲೆನಯ್ಯ, ಎಂದೇ ಹೇಳಿದರು
ತಾವ್‍ ಕುವೆಂಪು, ಬೀರಿದರು ಕನ್ನಡದಾ ಕಂಪು

ಪಾರು ಮಾಡಮ್ಮ ನೀ ಇಂಗ್ಲೀಷಿನಿಂದ
ಪೂತನಿಯ ಅಸುವೀಂಟಿ ಕೊಂದ ಗೋವಿಂದ    (ಕುವೆಂಪು ವಿರಚಿತ)

ಮಗುವೇ ಹೋರಾಡು ನೀನ್ ಕನ್ನಡಕೆ
ಕನ್ನಡತಾಯಿಗೆ ನೀನ್ ಬೇಕು, ಕನ್ನಡಾಂಬೆಯ
ನೀವ್ ರಕ್ಷಿಪ ಬೇಕು, ಅದುವೇ ಬೆಳಕು
ಮರೆಯಬೇದೆಂದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

ಕನ್ನಡ ಎನೆ ಕುಣಿದಾಡುವುದೆನ್ನೆದೆ
ಕನ್ನಡ ಎನೆ ಕಿವಿ ನಿಮಿರುವುದು |    (ಕುವೆಂಪು ವಿರಚಿತ)

ನಲಿದಾಡಲಿ ನುಡಿ-ಕನ್ನಡ ನಾಲಿಗೆಯಲಿ,
ಕೇಳಿಬರಲಿ ಕನ್ನಡ ದಿಕ್ಕುದಿಕಿನಲಿ
ಕುಣಿದಾಡುವ ನಾವ್, ನಲಿದಾಡುವ ನೀವ್,
ನುಡಿದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

ನೀ ಮುಟ್ಟುವ ಮರ - ಶ್ರೀಗಂಧದ ಮರ
ನೀ ಕುಡಿಯುವ ನೀರ್ - ಕಾವೇರಿ   (ಕುವೆಂಪು ವಿರಚಿತ)

ದೇಶ, ವೇಶ ಯಾವುದಾದರೇನ್? ನಿನ್ನ ಕಸುಬು,
ನೌಕರಿ ಯಾವುದಾದರೇನ್? ಎಲ್ಲಿದ್ದರೇನ್? ತಿಳಿ
ಅದನೆ, ಕರ್ನಾಟಕ, ಕನ್ನಡ-ಕಸ್ತೂರಿ, ಚಿತ್ತವೆಲ್ಲ
ಪಸರಿಸಿರೆಂದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

ದೀಕ್ಷೆಯ ತೊಡು ಇಂದೇ|
ಕಂಕಣ ಕಟ್ಟಿಂದೇ, ಕನ್ನಡ ನಾಡೊಂದೇ   (ಕುವೆಂಪು ವಿರಚಿತ)

ಭಾಷೆಯ ಕೊಡು, ದಿಟ್ಟಿ ಇಡು, ಅದು
ಕನ್ನಡವೊಂದೇ, ಕರ್ನಾಟಕವೊಂದೇ,
ಧಮನಿ-ಧಮನಿಯಲಿ ಕನ್ನಡ ಮಾತೊಂದೇ
ತುಂಬಿರಲೆಂದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

ಜೈ ಭಾರತ ಜನನಿಯ ತನುಜಾತೆ|
ಜಯ ಹೇ ಕರ್ನಾಟಕ ಮಾತೇ |    (ಕುವೆಂಪು ವಿರಚಿತ)

ತಾಯೆ ಭಾರತಿ, ಕನ್ನಡ ಮಾತೇ,
ನೀ-ಎನ್ನ ಮಾತೇ, ನೀ ನಮ್ಮ ಮಾತೇ,
ಕರ್ನಾತಕ ಮಾತೇ, ಜೈ ಜೈ ಮಾತೇ
ನಮಿಸುವೆನೆಂದರು ಕುವೆಂಪು, ಬೀರಿದರು ಕನ್ನಡದಾ ಕಂಪು

(ಕುವೆಂಪು ಶತಮಾನೋತ್ಸವದ ನೆನಪಿಗಾಗಿ ೨೦೦೩ ರಲ್ಲಿ ಬರೆದದ್ದು. ದಟ್ಸ್ ಕನ್ನಡ.ಕಾಂ ನಲ್ಲಿ ಪ್ರಕಟವಾಗಿತ್ತು )
ರಚನೆ: ಚಂದ್ರಶೇಖರ ಬಿ.ಎಚ್.

ಈ ಮೂವರು ಭಾರತಾಂಬೆಯ ಹುತಾತ್ಮ ಪುತ್ರರು

ಭಾರತ ದೇಶದ ಸ್ವಾತಂತ್ರ್‍ಯ ಪೂರ್ವದಲ್ಲಿ (ಬ್ರಿಟಿಷ್ ಆಳ್ವಿಕೆಯ ಕಾಲದಲ್ಲಿ, ಕಳೆದ ಶತಮಾನದ ಹೊಸ್ತಿಲಲ್ಲಿ), ಯುವ ಕ್ರಾಂತಿಕಾರಿಗಳಾಗಿದ್ದ, ಭಗತ್ ಸಿಂಗ್, ಶಿವರಾಂ ರಾಜಗುರು ಹಾಗೂ ಸುಖದೇವ್‌ ಇವರ ಹೆಸರನ್ನು ಕೇಳಿದರೇ ಸಾಕು ಬ್ರಿಟಿಷ್ ಸಾಮ್ರಾಜ್ಯವನ್ನು ನಡುಗಿಸುವಂತಿದ್ದ ಗುಡುಗಿನಂತಹ ವ್ಯಕ್ತಿತ್ವದ ಇವರುಗಳನ್ನು ಲಾಹೋರ್‍ ಷಡ್ಯಂತ್ರದ ನೆಪದಲ್ಲಿ ಮಾರ್ಚ್ ೨೩, ೧೯೩೧ ರ ಮುಂಜಾನೆ ಗಲ್ಲುಶಿಕ್ಷೆಯ ಮೂಲಕ ಕೊಂದರು. ಆದರೆ, ಈ ಯುವಕರೆಲ್ಲರೂ ಹುತಾತ್ಮರೆಂಬ, ಶಹೀದ್‌ ಎಂಬ ಹೆಸರಿನಿಂದ ಇಂದಿಗೂ ಭಾರತದ ಯುವಕರಲ್ಲಿ ಮನೆಮಾಡಿದ್ದಾರೆ.

ಮೂವರೂ ಮಿತ್ರರು ಒಂದೇ ಕಾರಣಕ್ಕಾಗಿ, ಭಾರತಮಾತೆಯ `ದಾಸ್ಯತ್ವದ' ಬಿಡುಗಡೆಗಾಗಿ ಹುತಾತ್ಮರಾದದ್ದು ವಿಶ್ವ ಇತಿಹಾಸದಲ್ಲಿಯೇ ಪ್ರಮುಖವಾದುದು. ಆ ೨೧-೨೪ ವಯೋಮಾನದ ಆ ಯುವಕರುಗಳು ಕೇವಲ ಬ್ರಿಟಿಷರ ವಿರುದ್ಧ ಕರಪತ್ರ ಹಂಚುವ, ದೊಂಬಿ ಮಾಡುವ, ಬಾಂಬೆಸೆಯುವ ಕ್ರಾಂತಿಕಾರಿಗಳಾಗಿರಲಿಲ್ಲ. ಸಾರ್ವಜನಿಕರಲ್ಲಿ ಭಯ ಉಂಟುಮಾಡುವವರಾಗಿರಲಿಲ್ಲ. ಉನ್ನತ ಮಟ್ಟದ ಓದನ್ನು ಪಡೆದವರಾಗಿದ್ದರು, ಇತಿಹಾಸ ತಿಳಿದವರಾಗಿದ್ದರು, ಭಾರತದ ಭವಿಷ್ಯನ್ನು, ದೇಶಭಕ್ತಿಯನ್ನು ಹೃದಯದಲ್ಲಿ ತುಂಬಿಕೊಂಡವರಾಗಿದ್ದರು, ಅಂತಹ ಗೆಳೆಯರನ್ನು, ಯುವಶಕ್ತಿಯನ್ನು ಬ್ರಿಟಿಷರು ನಿರ್ದಾಕ್ಷಿಣ್ಯವಾಗಿ, ಜನರಿಗೆ ಹೆದರಿ, ಗಲ್ಲು ಶಿಕ್ಷೆಯ ಜಾರಿಗೆ ನಿಗದಿಪಡಿಸಿದ್ದ ದಿನಕ್ಕಿಂತ ಮೊದಲೇ, ಮುಂಚಿತವಾಗಿಯೇ, ಗುಟ್ಟಾಗಿಯೇ ಗಲ್ಲಿಗೇರಿಸಿದ್ದಲ್ಲದೇ ಅವರುಗಳ ಅಂತ್ಯಕ್ರಿಯೆಯನ್ನೂ ಸಹ...... ನೆರವೇರಿಸಿಬಿಟ್ಟರು. ಇವರ ಹೌತಾತ್ಮ್ಯದಿಂದಾಗಿ ಮತ್ತು ಅವರಲ್ಲಿದ್ದಂತಹ ಧೀ:ಶಕ್ತಿಯು, ಜನರನ್ನು ಮತ್ತಷ್ಟು ಒಗ್ಗೂಡಿಸಿ ಭಾರತಮಾತೆಯ ದಾಸ್ಯತ್ವದ ಸಂಕೋಲೆಗಳನ್ನು ಬಿಡಿಸುವಲ್ಲಿ ಮತ್ತಷ್ಟು ಬಲ ಸಿಕ್ಕಿತು.

ಇವೆಲ್ಲ ಘಟನೆಗಳೂ ನಡೆದು ಇಂದಿಗೆ ೭೯ ವರ್ಷಗಳಾಗುತ್ತಿವೆ. ಇಂತಹ ಸಂದರ್ಭದಲ್ಲಿ ನಮ್ಮ ಯುವಕರು, ಹಿರಿಯರು, ರಾಜಕೀಯ ನೇತಾರರು ಎಲ್ಲ ಇವರನ್ನು ನೆನೆಯುವ ದಿನ.

ಕೇವಲ ನೆನಪಿಸಿಕೊಂಡರೆ ಸಾಲದು. ಇಂದಿನ ಯುವಕರಲ್ಲಿ, ಹಿರಿಯರಲ್ಲಿ, ದೇಶ, ನಾಡು ಸಂಸ್ಕೃತಿ ಇವೆಲ್ಲ ಮಾಯವಾಗುತ್ತಿವೆ. ಕಾರಣ ಏನಿರಬಹುದು? ಹಣ ಮಾಡುವ ದಂಧೆಯೇ ಮುಖ್ಯ ಎನಿಸಿರಬಹುದೇ? ದೇಶ, ಭಾಷೆ, ಸಂಸ್ಕೃತಿ, ಕರ್ತೃತ್ವ ಶಕ್ತಿ, ಎಲ್ಲಕಿಂತ ಹೆಚ್ಚಾಗಿ ಮೌಲ್ಯ (ಜೀವನ ಮೌಲ್ಯ), ಆದರ್ಶ ಇವೆಲ್ಲ ಯಾರಿಗೆ ಬೇಕಾಗಿದೆ. ಈ ದಿನ ಮೆರೆದರೆ ಸಾಕು... ಎಂಬ ಮನೋಭಾವವೇ ಹೆಚ್ಚಾಗಿದೆಯಲ್ಲವೇ? ಯಾರು ಏನಾದರೇನು? ದೇಶ ಏನಾದರೇನು? ಸಂಸ್ಕೃತಿ ಏನಾದರೇನು? ನಾವ್ ಚೆನ್ನಾಗಿದ್ದರೆ ಸಾಕೆಂಬ ಮನೋಭಾವಗಳನ್ನು ಮಕ್ಕಳಿದ್ದಾಗಿನಿಂದಲೇ ಮನಸ್ಸಿನಿಂದ ದೂರೀಕರಿಸಬೇಕಲ್ಲವೇ?

ಇವೆಲ್ಲವ ವಿಚಾರಗಳನ್ನೂ ಇಂದಿನ ನಮ್ಮ ಯುವಜನತೆ, ಪೋಷಕರು, ಗುರು-ಹಿರಿಯರು, ರಾಜಕಾರಣಿಗಳು ಹಾಗೂ ಒಟ್ಟಿನಲ್ಲಿ ಭಾರತೀಯರೆಲ್ಲರೂ ಚಿಂತಿಸಬೇಕಾದ ವಿಚಾರ.

ವಂದೇ ಮಾತರಂ, ಭಾರತ್ ಮಾತಾ ಕೀ ಜೈ. ಜೈ, ಜೈ.

ಇಂತಹ ಅಪ್ರತಿಮ ದೇಶಭಕ್ತರ ಬಗೆಗಿನ ಓದಿಗಾಗಿ ಈ ಕೆಳಗಿನ ಅಂತರ್ಜಾಲತಾಣಗಳನ್ನು ನೋಡಿ.
www.shahidbhagatsingh.org/
http://www.freeindia.org/biographies/freedomfighters/bhagathsingh/page11.htm

ಚಂದ್ರಶೇಖರ ಬಿ.ಎಚ್.

ಮಹಿಳಾ ದಿನಾಚರಣೆ ಶುಭಾಶಯಗಳು

೧೦೦ನೇ ವರ್ಷಕ್ಕೆ ಕಾಲಿಡುತ್ತಿರುವ ಈ ಸಂದರ್ಭದಲ್ಲಿ....